مؤتمر برلين

#مالكم_كيف_تحكمون #مؤتمر_برلين #نزار_عبدالقادر_صالح س: الناس دي مالها قايمة وقاعدة ليها يومين يانزار ياولدي؟ ج: عشان مؤتمر برلين يا حبوبتي س: مؤتمر برلين ده شنو؟ ج: مؤتمر لتقديم دعم مالي للسودان يستفيدوا منه في تقديم المساعدات الإنسانية س: يعني ما لشراء أسلحة ومسيرات ودبابات وراجمات ألمانية؟ ج: أبدا يا حبوبتي س: طيب الناس دي مالها زعلانة يانزار ياولدي؟ ج: عشان الألمان والجهات المنظمة معاهم للمؤتمر ما قدموا دعوة لناس الحكومة يا حبوبتي س: منو الناس المعاهم ديل يانزار ياولدي؟ ج: فرنسا وبريطانيا وأمريكا والاتحاد الأفريقي والاتحاد الأوروبي س: ولييه ما قدموا ليهم دعوة يانزار ياولدي؟ ج: لانهم ما معترفين بالحكومة السودانية، بقولوا "ما شرعية" س: ومن متين الكلام ده؟ ج: من الإنقلاب العملوهو ناس البرهان وحميدتي يوم 25 أكتوبر 2021 س: حتى الإتحاد الأفريقي ما معترف بالحكومة؟ ج: أيوة يا حبوبتي وجمد عضوية السودان لحدي ما تجي حكومة مدنية وتعمل إنتخابات س: وحميدتي وحكومة تأسيس معترفين بينهم؟ ج: لا يا حبوبتي س: كلام عجيب، ووزراء خارجية الأمل وتأسيس ما عارفين الكلام ده يانزار ياولدي؟ ج: عارفين يا حبوبتي س: نرجع للمؤتمر، ده أول مؤتمر لتقديم الدعم للسودان يانزار ياولدي؟ ج: عنوان مؤتمر برلين يا حبوبتي "المؤتمر الدولي الثالث بشأن السودان" س: والأول والتاني كانوا وين ومتين؟ ج: الأول كان في باريس يوم 15 أبريل 2024 مع الذكري الأولى لقيام الحرب العبثية (تعهدات مالية بحوالي ملياري يورو)، وبرضو ما قدموا فيهو دعوة للحكومة السودانية س: والتاني؟ ج: كان في لندن برضو يوم 15 أبريل 2025 بعد مرور سنتين على الحرب (تعهدات مالية بحوالي مليار يورو) وبرضو ماقدموا فيهو دعوة لناس الحكومة س: يعني ناس الحكومة متعودين ما يقدموا ليهم دعوة في المؤتمرات دي يانزار ياولدي؟ ج: أيوة يا حبوبتي، عشان كده أنا مستغرب من الجوطة الحاصلة دي س: المؤتمر حضروهوا منو أمبارح؟ ج: وزراء وممثلين من 55 دولة، ومعاهم الهيئة الحكومية للتنمية (إيغاد) وجامعة الدول العربية؛ والمبعوث الشخصي للأمين العام للأمم المتحدة إلى السودان؛ المفوض السامي لحقوق الإنسان، ووكالات الأمم المتحدة المتخصصة؛ والأمين العام للجنة الدولية للصليب الأحمر؛ وممثلين عن البنك الدولي والبنك الأفريقي للتنمية، وكمان 38 منظمة غير حكومية دولية وسودانية وأعضاء من غرف الطوارئ. س: طيب شنو البميز مؤتمر برلين عن مؤتمري باريس ولندن يانزار ياولدي؟ ج: حاجات كتيرة يا حبوبتي، أول حاجة الجلسات التحضيرية للقوى المدنية السودانية الكانت في أديس أبابا قبل المؤتمر، المسارات الثلاثة الاجتماع الوزاري السياسي، والاجتماع الإنساني، والاجتماع المدني، تالت حاجة ربط أي دعم أو عملية سياسية بضغوط ملموسة على أطراف الحرب، بما في ذلك أدوات العقوبات والمساءلة، رابع حاجة ضمان ملكية سودانية حقيقية للعملية السياسية، وآخر حاجة تحديد جدول زمني واضح لمسار الحل السياسي حتى لا يتحول الحوار إلى غطاء لإطالة أمد الأزمة س: يعني المنظمين ما قدموا دعوة للحكومة، وفي نفس الوقت قدموها للمدنيين؟ ج: أيوة يا حبوبتي، المدنيين جاتهم الدعوة من الخماسية س: الخماسية؟ ج: الاتحاد الأفريقي، الأمم المتحدة، الاتحاد الأوروبي، الايغاد، وجامعة الدول العربية س: حمدوك كان موجود؟ ج: أيوة يا حبوبتي موجود ومعاه كمان قادة صمود س: والمدنيين نجحوا في برلين؟ ج: أيوة يا حبوبتي، كل إهتماماتهم إنعكست في البيان الختامي الطلع في نهاية المؤتمر، وكمان في الدعم المالي غير المتوقع للسودان. س: قالوا شنو في البيان الختامي؟ ج: كلام كتير، من بينه، إطلاق حوار سياسي سوداني–سوداني يمكن أن يمهد الطريق لانتقال مدني في السودان بمجرد التوصل إلى وقف دائم لإطلاق النار. وقال نرى أن هذه العملية أساسية لضمان مستقبل شامل ومدني وديمقراطي للسودان. ويهدف هذا الانخراط المدني إلى تكملة جهود الوساطة الدولية الجارية، بما في ذلك عمل الرباعية بشأن وقف إطلاق النار، ومشاورات الخماسية دعماً لحوار سياسي سوداني–سوداني مستقبلي. س: شنو أهم حاجتين طلع بيهم مؤتمر برلين يانزار ياولدي؟ ج: التعهدات المالية لخطة الاستجابة الإنسانية، وتأسيس آلية جديدة لضمان تنسيق الضغوط الدولية من أجل وضع حد للصراع المستمر في البلد من يوم 15 أبريل 2023. س: لييه الألمان كانوا عشمانين يجمعوا كم في المؤتمر ده للسودان يانزار ياولدي؟ ج: مليار يورو يا حبوبتي س: وفي النهاية المبلغ طلع كم؟ ج: 1.5 مليار يورو، يعني قريب 1.8 مليار دولار، أكتر مما كانوا متوقعين س: طيب لييه البلابسة بقولوا مؤتمر برلين فشل؟ ج: ده بقولوا عليهو يا حبوبتي "حلم الجعان عيش" كيف فشل وورائه كل الدبلوماسية الألمانية ومعاهم باقي الجهات المنظمة، وحاضرينه 55 وزير ومسؤول ذي ما قلت ليكي ومانحين؟ كيف فشل وتم تجميع مبالغ أكتر مما كان متوقع؟ كيف فشل والجاكومي وأردول مع المدنيين توافقوا على الوثيقة المشتركة ووقف الحرب والسلام؟ #سويسرا 16 أبريل 2026م