فساد السودان

خليل محمد سليمان. في حياتي ما حصل اصبت باحباط زي يوم الليلة بعد خبر توزيع الشركة السودانية للاتصالات مبلغ 2.3 مليون دولار من ارباحها علي اعضاء مجلس الادارة و هم تسعة اعضاء مقابل 261 الف دولار للعضو الواحد..و اغلبهم موظفين حكومة.. الاعضاء هم.. 1/ الفريق ابراهيم جابر .. عضو مجلس السيادة.. ممثل حكومة السودان.. رئيس مجلس الادارة 2/ جبريل ابراهيم .. وزير المالية " فكي جبرين" لغير الناطقين بها ..ممثل حكومة السودان 3/ حسن عثمان سكوتة .. ممثل بنك التضامن 4/ الجيلي تاج الدين ابو شامة..عضو مجلس ادارة 5/ طه الطيب احمد.. عضو مجلس ادارة 6/ الحميدي مناحي العنزي..ممثل المؤسسة العربية للاتصالات الفضائية.. " من الاسم اجنبي" 7/ احمد محمود احمد عبد القوي..عضو مجلس ادارة 8/ برعي الصديق علي احمد .. ممثل بنك السودان 9/ محمد الفاتح حسن عثمان.. عضو مجلس ادارة خليكم من الحوار دا كله .. الشركة دي حكومية.. آي والله قادرين تتخيلو دا في بلد اكثر من نصف شعبها عايش في معسكرات بين لجوء و نزوح، و الباقي بياكل وجبة واحدة من التكايا " بمبادرات اهلية و فاعلين خير"!!! كسرة.. قلنا ترس السودان.. طلعوا علينا الرمم قالوا ح تجوعونا!! نتحدث عن الفساد يطلعوا علينا الجهلة و الغوغاء و يقولوا علينا عنصريين.. قولاً واحداً.. الدولة دي من رئيسها الي خفيرها فاسدة.. بالمنطق.. الرئيس لو ما فاسد لا يمكن ان يسكت علي فساد محمي بالقانون.. اخيراً.. عن نفسي ساعلق مشاركتي في اي عمل تطوعي او اي مساهمة في ايّ عمل عام في دولة بهذا الحجم من الفساد! اعتقد مجتمع لا يستطيع وضع حد لهذا الفساد الباين و مشرع بالقانون هو شريك في هذا الفساد!! قادر تتخيل في امريكا كاكبر اقتصاد في العالم قيمة العمل الطوعي سنوياً يعادل 167.3 مليار دولار.. آيّ والله يعني اي دولار او ساعة عمل تقدمها انت بتكون واثق انها بتذهب في مكانها الصحيح.. عندنا في السودان بنساعد اللصوص و الحرامية.. آي والله عشان بنعمل حاجات اساسية هي في الاصل مفروض يعملوها هم.. لمان نقوم بيها كعمل طوعي بنوفر عليهم المال ليسرقوهو.. آي والله قادر تتخيل 2.3 مليون دولار يتم توزيعها من المال العام علي 9 اشخاص اغلبهم موظفين في الدولة ممكن تحل مشكلة المياه في مدن بحالها و قرى و ولايات او الكهرباء!! عشان كدا وفر مالك و جهدك لحدي ما نبقى مجتمع محترم يعرف كيف يحارب الفساد و يضع حداً لهذه المهازل!